Серік Ақылбайдың Конституциялық комиссия ұсынған түзетулер жобасына берген бағасы елімізде
жүргізіліп жатқан конституциялық реформалардың ауқымы мен маңызын айқын көрсетеді. Ұсынылған
өзгерістердің көлемі мен тереңдігі жекелеген нормаларды түзету деңгейінен әлдеқайда жоғары екенін,
іс жүзінде Қазақстанның жаңа Конституциясын қалыптастыру туралы сөз қозғауға толық негіз бар екенін
дәлелдейді.
Жаңа институционалдық архитектураның – бір палаталы Парламент, Халық кеңесі, жаңартылған Үкімет
моделі, сот және құқық қорғау жүйелерінің енгізілуі – мемлекетті басқару тиімділігін арттыруға, билік
тармақтары арасындағы тепе-теңдікті нығайтуға және құқық айқындығын қамтамасыз етуге бағытталған. Бұл өзгерістер қоғамның қазіргі заманғы талаптарына сай келетін, адам құқықтарын қорғауды күшейтетін басқару жүйесін қалыптастыруға мүмкіндік береді.
Сонымен қатар Конституцияда діннің мемлекеттен бөліну қағидатын нақты әрі егжей-тегжейлі бекіту –
зайырлы мемлекеттің іргетасын нығайтатын маңызды қадам. Діни ұйымдардың қызметін заң аясында
реттеу, ұлттық қауіпсіздік пен қоғамдық тәртіпті, азаматтардың құқықтары мен бостандықтарын қорғау
тетіктерін нақтылау қоғамдағы тұрақтылық пен келісімді сақтауға ықпал етеді. Адвокатураның мәртебесін
қосымша пысықтау да құқықтық қорғау институттарының рөлін арттырып, азаматтардың әділ сотқа қол
жеткізуін қамтамасыз етуге бағытталған.
Жалпы алғанда, Конституциялық комиссияның жұмысы Қазақстанның конституциялық дамуының
сапалы жаңа кезеңіне қадам басқанын көрсетеді. Ұсынылған өзгерістер мемлекеттіліктің негізгі
құндылықтарының сабақтастығын сақтай отырып, жинақталған құқық қолдану тәжірибесін ескеруге
және құқықтық, демократиялық мемлекетті одан әрі нығайтуға қызмет етеді.
Қоғамдық пікір көшбасшысы - К.Анипин
