Балқаш ауданына қарасты Топар ауылындағы №115 сайлау учаскесіне Қошағұловтар әулетінің үлкен отбасы келіп, өз таңдауларын жасады. Қошағұловтар отбасында 10 бала өсіп-өнген. Бүгінде әулеттің үлкендерінен тараған 22 немере мен 13 шөбере бар.
Дауыс беруге отбасының үш буын өкілдері бірге келді. Үлкендер үшін бұл – өздерінің өнегесі арқылы балалары мен немерелеріне ел болашағына әр азаматтың қатысы бар екенін көрсетудің тағы бір мүмкіндігі.
– Біздің отбасымыз үлкен болғандықтан, біз балаларымыздың, немерелеріміз бен шөберелеріміздің болашағын ерекше ойлаймыз. Қазақстанның өркендеп, елімізде бейбітшілік пен келісімнің салтанат құрғанын қалаймыз. Жастарымыздың туған жерінде білім алып, еңбек етіп, бала тәрбиелеуіне барлық жағдай жасалса дейміз. Бүгін отбасымызбен бірге дауыс беруге келдік. Өйткені елдің болашағы әрқайсымыздың таңдауымызға байланысты деп есептейміз, – деді Қошағұловтар отбасы.
Үш буынды бір шаңырақтың өкілдерін ортақ мақсат – елдің өркендеуі мен кейінгі ұрпақтың жарқын болашағы біріктіреді.
