Конституция – мемлекеттің басты заңы, елдің саяси, құқықтық және қоғамдық өмірінің негізін айқындайтын маңызды құжат. Ол азаматтардың құқықтары мен бостандықтарын қорғап, қоғамдағы тұрақтылықты қамтамасыз етуге, мемлекеттік басқару жүйесінің қызметін реттеуге бағытталған. Сондықтан Конституцияның жаңаруы – ел өміріндегі маңызды мәселелердің бірі. Ол қоғамның даму бағытына, халықтың мемлекетке деген сеніміне және болашақ ұрпақтың өміріне ықпал етеді.
Жаңарған Конституция туралы сөз қозғағанда, ең алдымен, заң үстемдігі, әділдік, жауапкершілік және адам құқығын құрметтеу қағидаттарына назар аудару қажет. Құқықтық мемлекет құрудың басты шарты – заңның баршаға ортақ болуы. Заң алдында барлық азамат тең болып, әрбір адамның құқығы қорғалуы тиіс. Қоғамда әділдік орнаған кезде ғана халықтың мемлекетке деген сенімі нығайып, елдің тұрақты дамуына жол ашылады.
Конституцияның негізгі құндылықтарының бірі – адам және оның қадір-қасиеті. Әрбір азаматтың өмір сүруге, білім алуға, еңбек етуге, өз пікірін еркін білдіруге және заңмен қорғалуға құқығы бар. Бұл құқықтарды сақтау – мемлекеттің ғана емес, бүкіл қоғамның ортақ міндеті. Азаматтардың құқықтары құрметтелген ортада өзара түсіністік қалыптасып, қоғамдық келісім мен бірлік нығаяды.
Жаңарған Конституцияның маңызын түсіну үшін азаматтардың құқықтық сауаттылығын арттыру да ерекше рөл атқарады. Әр адам өз құқықтары мен міндеттерін білуі, заң талаптарын сақтауы және қоғамдық тәртіпке жауапкершілікпен қарауы қажет. Құқықтық мәдениеті жоғары қоғамда заң бұзушылыққа, жемқорлыққа, зорлық-зомбылыққа және әділетсіздікке төзбеушілік қалыптасады. Бұл – қауіпсіз әрі өркениетті ел қалыптастырудың маңызды негізі.
Мемлекеттің өркендеуі халықтың бірлігі мен ынтымағына да байланысты. Қазақстан – түрлі этнос өкілдері бір шаңырақ астында өмір сүріп жатқан ортақ Отанымыз. Қоғамдағы татулықты сақтау, өзара құрмет пен келісімді нығайту – әрбір азаматтың азаматтық борышы.
Сонымен қатар, білімді ұрпақ тәрбиелеу, жастардың әлеуетін дамыту және олардың қоғам өміріне белсенді қатысуына жағдай жасау маңызды.
Тоқсан ауыз сөзімнің тобықтай түйіні ретінде айта келе, жаңарған Конституция – елдің тұрақтылығы мен дамуына бағыт беретін маңызды құқықтық негіз. Оның қағидаттарын сақтау, заңды құрметтеу, әділдікті қолдау және азаматтық жауапкершілікті сезіну – баршамызға ортақ міндет. Әр азамат өз ісіне адал болып, қоғам игілігі үшін еңбек етіп, ел бірлігін сақтауға үлес қосса, Қазақстанның болашағы да жарқын болады.
Заң үстемдік құрған, әділдік салтанат құрған және адам құқығы қорғалған мемлекет қана тұрақты дамудың биік белестеріне қадам баса алады.
Күмісбек Ербаев,журналист.
