Тазалық – туған жерге деген сүйіспеншіліктің, мәдениеттілік пен жауапкершіліктің белгісі. «Таза Қазақстан» жалпыұлттық экологиялық бастамасы қоршаған ортаны қорғауға, елді мекендерді абаттандыруға және тұрғындардың экологиялық мәдениетін қалыптастыруға бағытталған.
Бұл бастама аясында сенбіліктер ұйымдастырылып, көшелер, аулалар, саябақтар мен қоғамдық орындар тазартылып, көгалдандыру жұмыстары жүргізілуде. Мұндай шараларға тұрғындармен қатар жастар, еріктілер мен түрлі мекеме қызметкерлері де белсенді атсалысып келеді.
Алайда тазалық тек сенбілік кезінде ғана емес, күнделікті сақталуы қажет. Қоқысты белгіленген орынға тастау, табиғатты ластамау, ағаштар мен гүлдерді күтіп-баптау – әр азаматтың қарапайым әрі маңызды міндеті.
«Таза Қазақстан» – айналаны тазарту ғана емес, елге деген жанашырлықты қалыптастыратын игі бастама. Туған жеріміздің таза, көрікті әрі жайлы болуы әрқайсымыздың ісімізге байланысты.
Таза ел – жарқын болашақтың негізі. Тазалықты әркім өз ауласынан бастаса, бүкіл Қазақстан көркейе түседі.
