Менің ойымша, Қазақстан Республикасы Конституциясының 94–96-баптары жаңа Конституцияға көшу кезеңіндегі құқықтық сабақтастық пен мемлекеттік басқарудың тұрақтылығын қамтамасыз етуге бағытталған маңызды нормалар болып табылады.
94-бапта жаңа Конституцияның күшіне ену мерзімі нақты белгіленіп, бұрынғы Конституцияның қолданысы тоқтатылатыны көрсетілген. Сонымен қатар Конституция қабылданған күннің мемлекеттік мереке ретінде жариялануы халықтың елдің негізгі заңына деген құрметін арттырады деп ойлаймын.
95-бапта мемлекеттік билік органдарын жаңадан қалыптастыру тәртібі мен мерзімдері айқындалған. Құрылтай сайлауын өткізу, Вице-Президентті тағайындау және басқа да маңызды мемлекеттік лауазымдарға жаңа тағайындаулар жасау тәртібінің белгіленуі билік жүйесінің жүйелі түрде жаңаруына мүмкіндік береді. Ал бұрын тағайындалған лауазымды тұлғалардың өкілеттіктерін жаңа құрам қалыптасқанға дейін сақтауы мемлекеттік басқарудағы сабақтастықты қамтамасыз етеді.
96-баптың маңызы ерекше деп санаймын. Себебі қолданыстағы заңдар мен нормативтік құқықтық актілердің Конституцияға қайшы келмейтін бөлігінде күшін сақтауы құқықтық вакуумның пайда болуына жол бермейді.
Қорыта айтқанда, аталған баптар конституциялық өзгерістерді кезең-кезеңімен жүзеге асыруға, мемлекеттік басқару жүйесінің тұрақтылығын сақтауға және елдегі құқықтық тәртіптің үздіксіздігін қамтамасыз етуге негіз болады.
Күмісбек Ербаев, журналист.
