Заң алдында барлығының тең болуы, азаматтардың құқықтары мен заңды мүдделерінің қорғалуы, мемлекеттік органдардың өз қызметінде заң талаптарын басшылыққа алуы әділетті қоғам қалыптастырудың маңызды шарттары болып саналады.
Жаңа Конституция осы қағидаттардың құқықтық негізін айқындап, қоғамдағы тәртіп пен жауапкершіліктің сақталуына жол ашты.
Сонымен қатар жаңарған Конституцияның қоғамдық маңызы азаматтардың мемлекет басқару ісіне деген көзқарасымен де тығыз байланысты. Қоғамдық белсенділік, ашықтық, пікір алуандығы және азаматтық жауапкершілік елдің тұрақты дамуына ықпал етеді. Әрбір азамат өз құқығын біліп қана қоймай, қоғам алдындағы міндетін де терең түсінуі қажет. Өйткені мемлекеттің өркендеуі тек мемлекеттік органдардың жұмысына емес, халықтың ортақ мақсат жолындағы бірлігі мен белсенділігіне де байланысты.
Адам құқықтары мен бостандықтарын қорғау – конституциялық дамудың басты бағыттарының бірі. Әр азаматтың білім алуға, еңбек етуге, денсаулығын қорғауға, өз ойын еркін білдіруге және қауіпсіз ортада өмір сүруге құқығы бар. Бұл құқықтардың нақты жүзеге асуы үшін заң нормаларының орындалуы, әділ сот жүйесінің жұмыс істеуі және мемлекеттік институттардың жауапкершілігі маңызды.
Әсіресе жас ұрпақтың конституциялық сауаттылығын қалыптастырудың маңызы зор. Өз құқығы мен міндетін білетін, ел тағдырына бейжай қарамайтын, заңды құрметтейтін ұрпақ – мемлекеттің тұрақты дамуының кепілі. Сол себепті құқықтық тәрбие отбасынан басталып, білім беру ұйымдары мен қоғамдық ортада жүйелі түрде жалғасуы қажет.
Қорытындылай келе айтарым, жаңарған Конституция – мемлекеттің құқықтық негізін жетілдіруге, қоғамдық қатынастарды дамытуға және азаматтардың болашаққа деген сенімін нығайтуға бағытталған маңызды құндылық. Оның басты мақсаты – адам мүддесі қорғалатын, заң үстемдік ететін, әр азаматтың мүмкіндігі мен жауапкершілігіне мән берілетін қоғам қалыптастыру.
Конституция – мемлекеттің құқықтық тұғыры, халықтың ортақ құндылығы және келешек ұрпақ алдындағы жауапкершілігіміздің айқын көрінісі. Заңды құрметтеу, ел бірлігін сақтау және әділетті қоғам құру – баршамызға ортақ міндет.
Күмісбек Ербаев,журналист.
