Биыл «Бір белдеу – бір жол» бастамасына - 10 жыл толып отыр. Қытай Халық Республикасымен тығыз ынтымақтастық пен іскерлік байланыс орнату мақсатындағы ірі жобада облысымыздың рөлі ерекше.
Осы орайда өткен жылы Алматы облысының бизнес делегациясы Шыңжаң Ұйғыр автономиялық ауданына бірнеше рет барып, ол жақтың бизнес өкілдері де біздің өңірімізге келген болатын. Осы жолы да екі ел арасындағы ауыл шаруашылық саласының экономикалық әле
уетін саралап, жаңа технологияларды таныстырып, тәжірибе алмасу мақсатында шекаралас мемлекеттің ауылшаруашылық мамандары мен кәсіпорын өкілдері Қонаев қаласына арнайы келді.
Алыстан келген қонақтарды облыс әкімінің орынбасары Алмас Батанов қарсы алып, облыс әкімдігінің мәжіліс залында жиын өткізді. Кездесуде екі елдің ауыл шаруашылығы әлеуеті таныстырылып, аграрлық саладағы өзара тиімді ынтымақтастық мәселелері талқыланды. Сөз тізгінін алған Алмас Сұлтанұлы былтыр облысымыздың тауар өндірушілері Шыңжаң Ұйғыр автономиялық ауданы басшылығының ұйымдастыруымен Қорғастағы көрмеге қатысқанын, онда кең таралған жаңа технологияларды қолдану арқылы ауыл шаруашылығы өнімдерін қайта өңдеу, интенсификациялау бағытында үлкен мүмкіндіктерге көз жеткізгенін айтып өтті.
Жұмыс сапарымен келген көрші елдің кәсіпкерлері мен шаруашылық өкілдері облыс орталығында өткен жиыннан соң біздің ауданға да атбасын бұрып, «Агрофирма «Бірлік» ЖШС-ның егіс алқабына келіп, дала жұмыстарымен танысты.
Өз тілшімізден.
