Өткен аптаның жұмасы күні аудандық Орталық аурухананың мәжіліс залында Қазақстан Республикасы Конституциясының 30 жылдық мерейтойына орай денсаулық сақтау саласына сүбелі үлес қосып жүрген дәрігерлерге Кәсіподақ ұйымының мерекелік төсбелгілері табысталды.
Салтанатты іс-шараға аудандық Ардагерлер кеңесінің төрағасы Бақыт Сқабаев, аудандық Кәсіподақ ұйымының төрағасы Самат Рақышев, «АМАNАТ» партиясы Балқаш аудандық филиалының төрағасы Марат Ноғайбай, аудан әкімінің аппаратының мемлекеттік қызметтер мониторингі және ақпараттық технологиялар бөлімінің басшысы Мәди Сейтқұл, сонымен қатар қоғамдық келісім және даму орталығының жетекші сарапшысы Ғалия Жүсіпова арнайы қатысты.
Мерекелік жиынды жүргізген аудандық Орталық аурухана директоры Қамар Сламханқызы қонақтарға сөз кезегін беріп отырды. Салтанатты шарада сөз алған аудандық Ардагерлер кеңесінің төрағасы Бақыт Сқабаев, аудандық Кәсіподақ ұйымының төрағасы Самат Рақышев, «АМАNАТ» партиясы Балқаш аудандық филиалының төрағасы Марат Ноғайбай аурухана ұжымын Қазақстан Республикасы Конс-титуциясының 30 жылдық мерейтойына орай денсаулық саласында еселі еңбек етіп, Гиппократ антына адал, адам жанының арашасы саналатын ақ халатты абзал жандарға өздерінің жүрекжарды тілектерін арнап, олардың жұмыстарына сәттілік, отбасына амандық тілеп, еңбектеріне лайықты құрмет көрсетіп, марапаттады.
Марапаттау барысында аудандық Орталық аурухана директорының медици-налық қызмет сапасын бақылау жөніндегі орынбасары Дінмұхамед Нүсіпов пен емхананың жалпы тәжірбиелі дәрігері Альмира Түйтебек «Үздік қызметкер үшін» төс-белгісімен марапатталса, емхана бөлімінің терапевт дәрігері Аида Алтаеваға, жан сақтау бөлімінің анестезиолог реаниматолог дәрігері Бақытжан Ғазизға және терапия бөлімінің терапевт дәрігері Дидар Көбе-геноваға «Еселі еңбегі үшін» төсбелгісі табысталды.
Жайдарман жаңалыққа куә болған ақ халатты абзал жандар әріптестерін құттықтап, аудандық Кәсіподақ ұйымына ризашылықтарын білдірісіп, естелік суреттерге түсіп, мәре – сәре болып тарқасты.
Адам өміріндегі қуанышты сәттерінің бірі ел – жұртына сіңірген еселі еңбегінің бағаланып, лайықты марапатқа ие болғаны. Ақ халатты мейірман жандардың халыққа сіңірген еңбектері ұшантеңіз.
Өңіріміздегі денсаулық сақтау саласын дамытып, тұрғындарға заман талабына сай, қолжетімді және сапалы медициналық қызмет көрсету жолында бар күш – жігерлерін жұмсап жүрген өз мамандығының хас шеберлеріне көрсетілген бұл құрмет олардың ұзақ жылдар бойы халыққа сіңірген еселі еңбектерінің жемісі.
Өз тілшімізден.
