«Отан – отбасынан басталады» дейді дана халқымыз. Биылғы «Наурызнама» онкүндігі аясында 17 наурыз – Шаңырақ күніне орай Топар ауылдық кітапханасында ерекше мерекелік рух сезілді. Онда мектеп оқушыларының қатысуымен «Шаңырақ күні – отбасы мен бірліктің мерекесі» атты танымдық квест ойыны жоғары деңгейде өткізілді.
Ұлттық құндылықтарды ұлықтап, жас ұрпақтың бойына отбасылық бірлік пен салт-дәстүрге деген құрметті сіңіруді мақсат еткен бұл шара кәдімгі жиыннан өзгеше, заманауи интерактивті форматта ұйымдастырылды.
Дәстүр мен заманауи үндестік
Квест барысында Топар орта мектебінің оқушылары бірнеше бекеттен тұратын сынақтардан өтті. Бойларындағы өнерін паш етіп, мың бұрала ұлттық би билесе, «Білектегі күш – жүректегі сенім» демекші, қол күрес сайысында нағыз палуандарға тән қажыр-қайрат көрсетті. Шығармашылық кезеңде оқушылар өздерінің отбасы туралы пайымдарын ақ қағазға суретпен түсіріп, жүрекжарды тілектерін жеткізді.
Білім мен таным бәсекесі
Шараның ең маңызды бөлімі – салт-дәстүр мен мәдениетке қатысты сұрақ-жауап кезеңі болды. Оқушылар тек физикалық тұрғыдан емес, интеллектуалдық тұрғыдан да дайын екендіктерін дәлелдеп, логикалық тапсырмаларды мүдірмей орындады.
«Шаңырақ – тек үйдің төбесі емес, ол – бүкіл елдің бірлігі мен берекесінің символы. Бүгінгі шара арқылы балалардың бойынан ұлтына деген мақтаныш сезімін көрдік», – дейді ұйымдастырушылар.
Квест соңында қатысушылар тек жеңіске ұмтылып қана қоймай, өзара сыйластық пен ынтымақтың мәнін терең ұғынды. Онкүндік аясындағы бұл игі шара оқушылардың жадында ерекше әсермен сақталып, ұлттық тәрбиенің жаңа белесіне айналды.
Шаңырағымыз биік, босағамыз берік болсын!
Лаура Шалданбаева, Топар ауылдық кітапханасының кітапханашысы
