Алкоголизм – адам денсаулығына, отбасы тыныштығына және қоғамның дамуына үлкен зиян келтіретін қауіпті дерттердің бірі. Ішімдікке тәуелділік адамның физикалық және психологиялық жағдайын әлсіретіп қана қоймай, оның өмірге деген көзқарасын өзгертіп, әлеуметтік мәселелерге алып келеді. Сондықтан алкоголизмнің алдын алу – әрбір қоғам үшін маңызды міндет.
Алкогольді шамадан тыс пайдалану адам ағзасына ауыр әсер етеді. Ең алдымен жүйке жүйесі, жүрек, бауыр және асқазан мүшелері зақымданады. Сонымен қатар ішімдік адамды ашушаң, күйгелек етіп, отбасы ішіндегі түсініспеушіліктер мен жанжалдардың көбеюіне себеп болады. Кей жағдайда қылмыс пен жол-көлік оқиғаларының орын алуына да алкоголь әсер етеді.
Алкоголизмнің алдын алу ең алдымен отбасынан басталады. Бала тәрбиесінде ата-ананың рөлі ерекше. Егер бала отбасында салауатты өмір салтын көріп өссе, зиянды әдеттерден аулақ болады. Сонымен қатар мектептерде, колледждер мен жоғары оқу орындарында түсіндіру жұмыстарын жиі өткізу маңызды.
Жастарға алкогольдің зияны туралы нақты ақпарат беріліп, спорт пен өнерге қызығушылығы арттырылуы керек.
Қоғамда салауатты өмір салтын насихаттау да профилактиканың тиімді жолдарының бірі.
Өз тілшімізден.
