Конституцияның басты құндылығы – адам және оның қадір-қасиеті. Әрбір азаматтың өмір сүруге, білім алуға, еңбек етуге, өз пікірін еркін білдіруге, жеке басының қауіпсіздігіне және заң алдында тең болуға құқығы бар. Бұл құқықтар қағаз жүзінде ғана қалып қоймай, күнделікті өмірде нақты жүзеге асуы тиіс. Себебі әділетті қоғам ең алдымен әр адамның құқығы қорғалған кезде қалыптасады.
Қоғамдағы тұрақтылық пен тәртіптің сақталуы да Конституция талаптарын құрметтеуден басталады. Заңға бағыну – тек міндет емес, ол әр азаматтың ел алдындағы жауапкершілігін білдіреді. Өз құқығын білетін, өзгенің құқығын құрметтейтін, қоғамдық тәртіпті сақтайтын азаматтар көбейген сайын мемлекет те нығая түседі. Сондықтан құқықтық сауаттылықты арттыру, әсіресе жас ұрпақтың бойына заңға құрмет сезімін қалыптастыру – бүгінгі күннің маңызды міндеттерінің бірі.
Конституцияның тағы бір маңызды қыры – ұлт бірлігі мен қоғамдық келісімді сақтау. Қазақстан – түрлі этнос өкілдері ортақ шаңырақ астында өмір сүріп жатқан мемлекет. Осындай қоғамда татулықты, өзара сыйластықты және бірлікті сақтау – баршамызға ортақ жауапкершілік. Елдің күші тек экономикалық көрсеткіштермен өлшенбейді. Оның шынайы қуаты – азаматтарының ынтымағында, ортақ мақсатқа жұмыла білуінде және Отанға деген сүйіспеншілігінде.
Бүгінгі жаһандану дәуірінде мемлекет алдында жаңа міндеттер мен талаптар тұр. Цифрлық технологиялардың дамуы, жасанды интеллектінің кеңінен қолданылуы, ақпараттық қауіпсіздік, экологиялық мәселелер мен әлеуметтік теңдік – барлығы да құқықтық реттеуді қажет етеді. Осындай өзгерістер жағдайында Конституцияның қоғам сұранысына жауап бере алуы, азаматтардың құқықтарын қорғау тетіктерінің жетілдірілуі аса маңызды.
Сонымен қатар Конституцияның өміршеңдігі оны қабылдаумен ғана шектелмейді. Оның қағидаттары мемлекеттік органдардың жұмысында, сот жүйесінде, білім беру саласында, еңбек қатынастарында және әрбір азаматтың күнделікті іс-әрекетінде көрініс табуы қажет. Заң бәріне ортақ болғанда ғана әділдік орнайды. Ал әділдік бар жерде халықтың мемлекетке деген сенімі артады.
Әсіресе жас ұрпақ үшін Конституцияның маңызын түсіндіру – болашаққа салынған инвестиция. Өйткені елдің ертеңін қалыптастыратын жастар өз құқықтары мен міндеттерін жақсы білуі керек. Отанға адал қызмет ету, сапалы білім алу, адал еңбек ету, қоғамдық өмірге белсенді араласу – азаматтық жауапкершіліктің нақты көрінісі.
Ата Заңды құрметтеу – мемлекетті құрметтеу. Оның талаптарын сақтау – елдің тұрақтылығы мен қауіпсіздігіне үлес қосу. Әрбір азамат заңды тек өз құқығын қорғаудың құралы ретінде ғана емес, қоғам алдындағы міндеттерін орындаудың негізі ретінде де қабылдауы тиіс.
Қорытындылай айтқанда, жаңа Конституция – өткеніміздің тағылымын, бүгініміздің жауапкершілігін және болашағымыздың үмітін тоғыстырған маңызды құжат.
Күмісбек Ербаев,журналист.
