14 наурыз – Амал мерекесі, яғни Көрісу күні Алматы облысында ерекше ықыласпен және жоғары деңгейде тойланды.
Ұлыстың ұлы күні – Наурыз мейрамының бастауы саналатын бұл күнде облыстың барлық аудандары мен
қалаларында түрлі мәдени-көпшілік іс-шаралар ұйымдастырылды. Соның ішінде 13-наурыз күні Іле, Ұйғыр,
Еңбекшіқазақ, Талғар, Жамбыл аудандары көштің басын бастап берсе, Алатау, Қонаев қалалары мен Райымбек,
Балқаш, Кеген, Қарасай аудандары мерекенің жалғасын 14-наурыз күні сән-салтанатымен көріктендірді.
Бұл күні жұртшылық бір-бірімен көрісіп, амандық-саулық сұрасып, үлкендерге құрмет көрсетіп, ұлттық дәстүрді
дәріптеді. Облыстың орталық алаңдары мен мәдениет үйлерінде ұлттық ойындар, концерттік бағдарламалар,
театрландырылған көріністер және көрмелер ұйымдастырылып, тұрғындарға көтеріңкі көңіл-күй сыйлады.
Әсіресе жастар мен еріктілердің белсенді қатысуы мерекенің мазмұнын байыта түсті. Олар үлкен буын өкілдерін
арнайы құттықтап, ұлттық құндылықтарды насихаттауға өз үлестерін қосты.
Көрісу күні – татулық пен бірліктің, сыйластық пен құрметтің символы. Осы игі дәстүр арқылы тұрғындар бір-біріне
ақ тілектерін арнап, жаңа жылдың бастауын жақсылықпен қарсы алды.
Алматы облысында өткен бұл мерекелік іс-шаралар ұлттық дәстүрлердің өміршеңдігін тағы бір мәрте айқындап,
ел бірлігі мен рухани сабақтастықтың маңызын көрсетті.
