Референдум – халықтың тікелей пікір білдіруінің маңызды тетігі. Бұл – әр азаматтың ел тағдырына қатысты шешім қабылдауға қатысуына мүмкіндік беретін демократиялық құрал. Қоғам белсендісі ретінде мен үшін референдум – жай ғана саяси науқан емес, ол – ортақ болашағымызға деген жауапкершілік.
Бүгінгі таңда елімізде жүргізіліп жатқан реформалар мен бастамалар халықтың қолдауына сүйенуі тиіс. Себебі мемлекет пен қоғам арасындағы сенім ашықтық пен белсенділік арқылы нығаяды. Референдум осы сенімді арттыратын тиімді жолдардың бірі.
Қоғам белсенділері әрдайым ел ішіндегі өзгерістерге бейжай қарамайды. Біз тұрғындармен кездесіп, түсіндіру жұмыстарын жүргізіп, әр азаматтың пікірін тыңдауға мүдделіміз. Өйткені шынайы демократия – халықтың үнін естуден басталады.
Референдум – бұл бір күндік таңдау емес, ол – ұзақ мерзімді даму бағытын айқындайтын қадам. Сондықтан әрбір азамат өз таңдауын саналы түрде жасап, болашақ ұрпақ алдындағы жауапкершілігін сезінуі керек.
Бірлік пен ынтымақ бар жерде ғана табыс бар. Ал референдум – сол бірлікті бекемдейтін, елді ортақ мақсатқа жұмылдыратын маңызды құрал. Ендеше, ел болашағына бейжай қарамай, белсенділік танытайық.
Жазира ҚАЗБЕКҚЫЗЫ, қоғам белсендісі.
